Në nderim të mijëra viktimave nga tërmeti në Turqi e Siri, Presidentja, Vjosa Osmani, e ka shpallur të mërkurën e 8 shkurtit ditë zie në Kosovë.
Osmani përmes një njoftimi në Facebook, ka shkruar se mendimet dhe lutjet e Kosovës janë për viktimat, të lënduarit dhe të gjithë të prekurit nga tërmeti.
“Përballë tragjedive të tilla duhet të qëndrojmë pranë atyre që kanë nevojë për mbështetje. Dhimbja e popullit turk dhe atij të Sirisë është edhe e jona. Prandaj, bazuar në kompetencat kushtetuese e ligjore, në shenjë respekti shtetëror e qytetar, ditën e mërkurë, 8 shkurt 2023 e kam shpallur Ditë Zie Shtetërore në Republikën e Kosovës, pas tërmeteve të datës 6 shkurt 2023 me epiqendër në Turqi, i cili la mijëra të vdekur e të lënduar”, ka shkruar presidentja e Kosovës.
Osmani tutje ka shkruar se Kosova është në dispozicion të plotë të vazhdojnë mbështetjen.
“Fuqia shkatërruese e këtij tërmeti ka tronditur zemrat e gjithsecilit, porse mbështetja ndaj njëri- tjetrit në këto ditë tmerri ngjallë shpresën dhe besimin se jeta do të triumfojë”, ka shkruar Osmani.
Tërmeti shkatërrues në Turqi e Siri ndodhi në orët e para të mëngjesit të së hënën, duke u pasuar me disa pasgoditje, derisa ka lënë të vdekur mbi 5 mijë persona.
