Pas takimit të 31 janarit, ambasadori amerikan, Jeff Hovenier do të organizojë sot një takim tjetër për të lehtësuar diskutimin e mëtejmë për Asociacionin.
Ashtu si në takimin e kaluar, Aleanca për Ardhmërinë e Kosovës (AAK) do të përfaqësohet nga Ardian Gjini. Kështu ka konfirmuar për Tëvë 1, zëdhënësi i AAK-së, Kushtrim Xhemaili.
“Po, Aleancën për Ardhmërinë e Kosovës në atë takim do ta përfaqësojë nënkryetari Ardian Gjini”, bëri të ditur ai.
Në takimin e fundit të mbajtur më 31 janar me përfaqësues të Ekzekutivit, partive politike e organizatave jo qeveritare, ambasadori Hovenier u është shprehur mirënjohës palëve të pranishme për pikëpamjet e tyre të treguara.
Teksa ka theksuar se duhet të zbatohen të gjitha angazhimet e dialogut.
Sa i përket Asociacionit, kryeministri Albin Kurti ka paraqitur 6 kushte në mënyrë që ta themelojë atë. Ai po ashtu ka pranuar propozimin evropian i cili parasheh implementimin e të gjitha marrëveshjeve të nënshkruara. Kjo është pritur pozitivisht nga Ambasada e SHBA-së. /Teve1.info/
