Shefi i deputetëve të PDK-së, Abelard Tahiri vlerëson se me dakordimin e arritur mes kryeministrit Kurti dhe presidentit serb Vuçiq dje në Ohër, ky i pari duhet të mbahet përgjegjës për siç ka thënë Tahiri denormalitetin e viteve që do të vijnë.
Tahiri ka shkruar se atij do t’i kërkojnë llogari politike për këtë dakordim.
“Pavarësisht pretendimeve për t’iu dhënë tjetër emër, gjërave shumë të qarta si zajednica e autonomia politike për serbët, nga dita e djeshme, që të dyja e kanë vulën e Albin Kurtit. Marrëveshja e tij me Vuçiqin, jo vetëm që nuk është e plotë për shkak se nuk i ka sjellë Kosovës as njohje, as funksionalitet, por është e pa përmbyllur sepse i ka hapur dyert dilemave të cilave Albin Kurti nuk do të mund t’iu shpëtojë me deklarata”, ka shkruar Tahiri.
Tahiri ka thënë se Kurti duhet të përgjigjet se çka ka zgjidhur kjo marrëveshje në çështjet e hapura mes të dyja vendeve.
“Njëkohësisht, në mes tjerash, ai duhet t’iu tregojë shqiptarëve të Mitrovicës së Veriut, se kur ata do të mund të kthehen në pronat dhe banesat e tyre të uzurpuara. Duhet të përgjigjet, se a u shpërbënë grupet e armatosura kriminale në veri të vendit, dhe cila është adresa nga e cila, qytetarët pa dallim etnie në komunat veriore të Kosovës, mund të kërkojnë siguri e rend tani e tutje. Duhet t’ua shpjegojë qytetarëve të Kosovës se pas kësaj marrëveshje, a janë ata më të sigurt që të lëvizin lirshëm në çdo cep të territorit të vendit”, ka shkruar Tahiri.
“Marrëveshje ka. Ajo nuk zgjidhë asgjë për Kosovën, as për të shkuarën, as për të ardhmen. Ajo rrezikon ta de funksionalizojë shtetin tonë dhe ta prishë balancin kushtetues mbi të cilin funksionon republika jonë. Ajo është marrëveshje për rehabilitimin e Aleksandër Vuçiqit, e cila e mbanë emrin e vulën e Albin Kurtit”.
