Ai në seancën që po mbahet sot u ka bërë thirrje sindikatave dhe Qeverisë së Kosovës që të gjejnë një zgjidhje për rikthimin e nxënësve në bankat shkollore.
“Të nderuar deputetë, i nderuar kryeministër, ju ftoj të uleni, të gjeni një kompromis sepse kjo krizë nuk i duhet askujt në Kosovë. Jemi prindër kemi fëmijët prandaj i dimë ndjenjat dhe emocionet e tyre, prandaj ju ftoj që me urgjencë të gjeni një kompromis me sindikata për të zhbllokuar gjendjen në arsim”, tha ai.
“Qytetarët që na shohin sot në këtë debat mund të kenë pikëpamje të ndryshme dhe emocione të përziera por të gjithë e kanë një hall të përbashkët, fëmijët i kanë në shtëpi në vend se me i pasë në shkollë”, shtoi ai.
Tahiri deklaroi se shkollat nuk janë mbyllë as në kohën kur Kuvendi i Kosovës është mbyllur dhunshëm në vitet e 90-ta ndërsa sipas tij në këtë kohë është e papranueshme të mbyllen shkollat, shkruan teve1.info
“Shkollat nuk janë mbyllë as atëherë kur kuvendi u mbyll dhunshëm për shqiptarët në vitet e 90-ta, dallimi është se atëherë shkollat nuk janë mbyll sepse mësimdhënësit tanë dhe qytetarët e Republikës së Kosovës i ka mbajtë vullneti për shtet e sot shtet kemi prandaj është e papranueshme me i mbyll shkollat”, ka thënë Tahiri.
Tahiri theksoi se nga kjo grevë nuk preken as Sinidkatat e as Qeveria por sipas tij preken fëmijët, prindërit dhe e ardhmja e tyre.
“Natyrisht se këtu ka dy palë, Sindikatat dhe Qeveria dhe realisht asnjëra nuk preken drejtpërdrejt nga mbyllja e shkollave por fëmijët po, prindërit po dhe e ardhmja po”, u shpreh ai.
Tutje Tahiri ka thënë se kërkesat e mësimdhënësve për të qenë të mundura duhet të bisedohet e të shihet mundësia për jetësimin e kërkesave të tyre.
“Mësimdhënësit sot kanë kërkesa konkrete që në parim janë legjitime e për të qenë edhe të mundura ato duhet të shtrohen të bisedohen e të shihet mundësia për jetësimin e tyre, por çka po ndodh, pas tri javësh në grevë nuk ka dialog”, shtoi ai./teve1.info
