Ambasada e Shteteve të Bashkuara të Amerikës në Kosovë, ka thënë se është e shqetësuar me deklaratat e liderëve dhe zyrtarëve të tjerë të partive opozitare të Kosovës, të cilët po e shprehin hapur kundërshtimin ndaj propozimit evropian për normalizimin e marrëdhënieve mes Kosovës dhe Serbisë.
“Këto pikëpamje nuk përputhen me mbështetjen e Shteteve të Bashkuara për propozimin”, ka thënë për teve1.info Katherine Judd, zëdhënëse e ambasadës amerikane.
Tutje Ambasada ka potencuar se përpjekjet e tyre për ta çuar përpara këtë propozim, kanë përfshirë edhe konsultimet me partitë opozitare.
“Shtetet e Bashkuara e kanë bërë të qartë në mënyrë të përsëritur se ne mbështesim Dialogun e lehtësuar nga BE. Në veçanti, ne e mbështesim plotësisht propozimin e BE-së për rrugën e normalizimit të marrëdhënieve ndërmjet Kosovës dhe Serbisë. Përpjekjet tona të përbashkëta për ta çuar përpara këtë propozim kanë përfshirë konsultimet me partitë opozitare të Kosovës” thuhet tutje në përgjigjen e tyre.
Në fund nga ambasada kanë përsëritur se mbështetja për planin franko-gjerman ka ardhur nga nivelet e larta, përfshirë presidentin Biden.
“Në nivelet më të larta të qeverisë, Shtetet e Bashkuara e kanë bërë të qartë këtë mbështetje. Presidenti Biden dhe Sekretari i Shtetit Blinken, në komunikimet e tyre të fundit për Ditën e Pavarësisë së Kosovës, nënvizuan se propozimi ka mbështetjen tonë të fortë dhe do ta avancojë shumë Kosovën drejt stabilitetit më të madh rajonal, prosperitetit ekonomik dhe integrimit evropian dhe euroatlantik”, bëhet e ditur në përgjigjen për teve1.info.
