Njohësi i çështjeve të Ballkanit, Daniel Serwer ka dalë me një varg kritikash për aneksin e zbatimit të marrëveshjes mes Kosovës dhe Serbisë, për të cilin u dakordua mbrëmë në Ohër.
Serëer vlerëson se Serbia mund të largohet nga kjo marrëveshja pasi nuk e ka vënë firmën në të.
“Zyrtarët e BE-së dhe SHBA-së do të donin që të besoni se kjo nuk ka rëndësi. Por ka. Sipas të drejtës ndërkombëtare, marrëveshjet e nënshkruara detyrojnë një shtet. Të panënshkruarat jo. Serbia mund të largohet nga të gjitha marrëveshjet me Kosovën, pasi ato janë të panënshkruara. Në fakt, nuk ka zbatuar shumë. As Kosova. Nënshkrimet do të bënin një ndryshim të madh. Prandaj Vuçiq reziston”, ka vlerësuar Serwer.
Duke folur për nenin 7 të marrëveshjes Serëer thotë se serbët e Kosovës marrin një nivel të “vetqeverisjes”, përderisa shqiptarët në jug të Serbisë, asgjë.
“Nuk ka reciprocitet. Serbia merr “vetëqeverisjen” e saj për qytetarët e saj në Kosovë, por shqiptarët që jetojnë në Serbinë jugore nuk kanë asgjë të krahasueshme”, vlerëson Serwer në analizën e tij.
Serwer shton se kjo marrëveshje nuk e parasheh njohjen e Kosovës nga Serbia as si qëllim të largët.
“Ndërsa një nënshkrim në këtë marrëveshje mund të jetë njohje virtuale, kjo mundësi nuk përmendet, qoftë edhe si një qëllim i largët. As nuk ka asnjë shenjë njohjeje nga pesë mosnjohësit e BE-së. Një marrëveshje e fokusuar në proces, pa nënshkrime, i lë shumë negociatave të ardhshme”, ka shkruar ai.
“Kjo është më shumë tym dhe pasqyrë sesa substancë. Ka më shumë gjasa të gjenerojë konfuzion të mëtejshëm sesa paqe”, përfundon amerikani.