Në njoftimin për media nga Prokuroria, kanë bërë të ditur se dy të arrestuarit me inicialet H.SH dhe N.M janë shtetas të Kosovës.
“Prishtinë, 23 shtator 2022 – Prokuroria Speciale e Republikës së Kosovës (PSRK), njofton se në vazhdim të hetimeve për rastin që ka të bëjë me sekuestrimin e 400 kilogramëve të substancave narkotike të llojit kokainë, sot, më 23 shtator 2022, ka realizuar bastisje në dy lokacione, sipas urdhrit të Departamentit Special të Gjykatës Themelore në Prishtinë, me ç’rast, përveç sigurimit të provave materiale, ka arrestuar dhe ndaluar dy (2) persona me inicialet H.SH dhe N.M, shtetas të Republikës së Kosovës”, thuhet në njoftim.
Sipas kësaj Prokurorie, të dyshuarit janë arrestuar nën dyshimin e bazuar për kryerjen e veprave penale, si në vijim: “pjesëmarrja dhe organizimi i grupit kriminal të organizuar lidhur me veprën penale blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge, si dhe për veprat penale të kryera në bashkëkryerje, pengimi i të provuarit apo procedurës zyrtare dhe frikësimi gjatë procedurës penale”.
Nga kjo Prokuroria Speciale e Kosovës kanë thënë se do të vazhdojnë procedurat e tjera ligjore në rastin konkret. /teve1.info/
