Aty u diskutua mbi gjendjen e këtij sektori, pas një propozimi të Partisë Demokratike të Kosovës për një rezolutë përmes së cilës i kërkojnë përgjegjësi qeverisë për situatën e krijuar.
Sipas deputetit, Bekim Haxhiu mungesa e ministrit të shëndetësisë është fyerje për profesionistët shëndetësor.
“Nëse për ju është Ok keqpërdorimi, nëse për ju është Ok mungesa e ministrit të shëndetësisë, është fyerje për ju që jeni profesionistë shëndetësor, është fyerje për të gjithë profesionistët shëndetësorë edhe Vetëvendosjen që e ka votuar, një ministër të Shëndetësisë mos me qenë në gjendje me emëru për një muaj e gjysmë, a nuk i beson ndonjërit prej juve këtu. Albin Kurti, a mundet ndonjëri prej juve me marrë përgjegjësi me thënë unë jam i gatshëm me marrë përgjegjësinë me udhëheq sektorin e shëndetësisë”, u shpreh Haxhiu.
E ish-ministri i Shëndetësisë, Armend Zemaj tha se qeveria nuk ka strategji për parandalimin e largimit të profesionistëve shëndetësor.
“Nuk ka plan, nuk ka strategji, nuk ka projekt, nuk ka dialog social për parandalimin e kësaj. Është fakt i njohur që problemet në shëndetësi janë afatgjate ashtu siç janë edhe strategjitë, është fakt i pamohueshëm që ka pasur keqpërdorime në sektorin e shëndetësisë, ka pasur edhe keqmenaxhim por jo të skajshëm ose tendencë për të mbuluar nga propaganda në pushtet, çdo kush që e ka bërë këtë adresa është e qartë, është prokuroria e shtetit, janë institucionet janë përgjegjësit ata të cilët i vënë para ligjit, dhe unë nuk kam pardon, as Lidhja Demokratike në kuptimin e saj, çdo kush e mer atë të cilën e meriton. Të nderuar deputetë, sidomos ju të shumicës, vajtimi për 20 vjet keq menaxhim në sektor të shëndetësisë nuk u ndihmon as nuk e arsyeton kryeministrin Kurti”, tha Zemaj.
Në anën tjetër, deputeti i Lëvizjes Vetëvendosje, Mirsad Shkreta fajin për gjendjen në shëndetësi ua la partive të tjera që ishin në pushtet, e tash në opozitë.
“Thua ti që Lëvizja Vetëvendosje ka menaxhuar gjithë këto vite me shëndetësi dhe e kuptoj tash që gjendja është keq në shëndetësi, po ju keni qeverisë me shëndetësi, gjithë këto vite keni qeverisë, dhe ju e dini fare mirë çfarë keni bërë me sistemin informativ shëndetësor, ju e dini fare mirë që 20 milionë dhe lënda është në prokuroi, ju e dini fare mirë që janë arrestuar njerëz për këtë çështje dhe ju e dini fare mirë që e keni udhëhequr ju këtë proces”, deklaroi Shkreta.
Për shkak të mungesës së kuorumit, rezoluta e propozuar nga Partia Demokratike e Kosovës, nuk hyri në votim.
Përmes kësaj rezolute, ndër të tjera kërkohej që Qeveria të rrisë pagat për profesionistët shëndetësorë.
Kronika e gazetares Fetije Kamberi.
