Rexhepi theksoi se tanimë është e domosdoshme të ndërtohet një strategji afatgjate, derisa shtoi se Kosova problemet më të mëdha i trashëgon nga Qeveritë e kaluara.
“Shtimi i masave emergjente është i nevojshëm, por nuk është afatgjatë. Qeveria Kurti me këto masat e deritanishme, ishin lehtësuese për qytetarët, megjithatë për strategji afatgjate duhet të merren parasysh shumë faktorë. Problemet më të mëdha Kosova i trashëgon edhe nga Qeveritë e kaluara. Tanimë duhet të ndërtohet një strategji e mirëfilltë tani e tutje, ose të ndërtohet një strategji më tepër afatgjate. Kosova ka nevojë për një strategji të saktë energjetike, pra në sektorin e energjisë”, u shpreh kështu Rexhepi në emisionin “Ditari” në Tëvë1.
Megjithatë, ministrja e Ekonomisë, Artane Rizvanolli, sot ka paralajmëruar përkeqësim të situatës të furnizimit me energji javëve në vijim, e për këtë çështje, Rexhepi tha se konsumi do rritej edhe më herët në qoftë se nuk do mbante mot i mirë.
Ndërsa, sa i përket paralajmërimit të Rizvanollit se bursat ndërkombëtare mund të jenë të larta, Rexhepi tha se aktualisht ato nuk janë edhe aq të larta.
“Pra, nëse në muajin janar ose eventualisht edhe në shkurt bien temperaturat, atëherë konsumi dhe nevoja për energji elektrike do të rritet. Prandaj, edhe çmimet do jenë shumë më të larta”, tha tutje Rexhepi.
I pyetur se a do të ndikojë kjo në tarifat e rrymës për kosovarët, Rexhepi potencoi se gjatë muajit dhjetor dhe janar, ka qenë e parashikuar që eventualisht të rishikohen tarifat për energji, mirëpo siç tha ai, fatmirësisht një gjë e tillë nuk ka ndodhur ende.
Kujtojmë se sot Ministrja e Ekonomisë, Artane Rizvanolli ka folur pas vendimit për zgjatjen e masave emergjente të furnizimit me energji.
Derisa ka paralajmëruar përkeqësim të situatës së furnizimit me energji javëve në vijim./teve1.info/.
