Por, në muajin e ardhshëm shteti i vetëm i izoluar i Ballkanit, pret një përgjigje konkrete nga Bashkimi Evropian, për largimin e regjimit të vizave.
Ditëve të fundit, presidentja e vendit Vjosa Osmani, është shprehur optimiste për këtë proces. Të mërkurën e para e shteti njoftoi se ka marrë mbështetje për liberalizimin edhe nga presidenti i Lituanisë.
Madje nga samiti i Bërdo-Brione në Slloveni, Osmani deklaroi se asnjë shtet i BE-së aktualisht nuk kundërshton liberalizimin e vizave.
Këto zhvillime, njohësi i çështjeve politike Visar Xani, po i konsideron si momentum të ri. Ai thotë se rrjedha e dialogut është ajo që vendos nëse Kosova do të marrë liberalizimin.
“Nëse vërtet Kosova dhe Serbia shohin një progres dhe kanë pas një lloj bashkëpunimi dhe progres në aspekt të dialogut kjo mund të rezultoi edhe me liberalizim të vizave. Pra është një momentum i ri, nëse vërtet edhe Kosova tregohet serioze në zbatimin e letrës e cila ka ardh prej kancelarit gjerman dhe presidentit francez”, ka thënë Xani.
Edhe Parlamenti Evropian për të disa herë radhazi ka konstatuar që Kosova ka përmbushur të gjitha kushtet për liberalizim dhe se BE duhet t’i japë fund kësaj çështjeje.
Kronika e realizuar nga Valmir Gallopeni
