Sipas asamblistit në Kuvendin Komunal të Mitrovicës, Gazmend Muja, kjo gjendje është tash e disa ditë, derisa ka ndodh se një gjë e tillë po ndodh pa paralajmërim për qytetarët.
“Po bëhen disa ditë që Mitrovica po terrorizohet pa ujë të pijes!
Shqetësim i madh për të gjithë qytetarët, si mund të jetohet në këtë vend pa infrastrukturë elementare për jetesë, derisa nuk kemi ujë as për pastrim dhe pije?!
Ne nuk e dimë ku qëndron problemi, por jemi taksapagues të faturave të energjisë dhe ujit. Pothuaj të gjitha kushtet klimatike janë mjaft të favorshme qe te kemi ujë”, ka shkruar asamblisti Gazmedn Muja në Facebook.
Ndërkohë vet zyrtarët e Komunës së Mitrovicës kanë thënë për teve1.info se si institucion nuk kanë marrë asnjë njoftim nga Kompania e Ujësjellësit për ndërprerjen e ujit.
I kontaktuar nga teve1.info drejtori i kompanisë së Ujësjellësit “Mitrovica”, Bashkim Kurti, nuk është përgjigjur.
Kurse gjate ditës së martë, në faqen zyrtare në Facebook, të KRU “Mitrovica”, është bërë e ditur se mungesa e ujit në këtë rajon po ndodh për shkak të disa problemeve në stabilimentet e Impiantit për Trajtimin e Ujit në Shipopl.
“Të nderuar konsumatorë,
Ditëve të fundit, jemi ballafaquar me disa probleme teknike të cilat kanë ardhur si pasojë e shfaqjes së defekteve në stabilimentet e Impiantit për Trajtimin e Ujit në Shipol dhe njëkohësisht edhe çrregullimin e furnizimit me ujë të pijes.
Edhe sot jemi duke u ballafaquar me problemin përderisa ekipet e mirëmbajtjes janë duke punuar vazhdimisht në evitimin e defekteve të cilat normalisht që në një proces të tillë të trajtimit edhe ndodhin.
Shpresojmë që sa me parë të rregullojmë këto probleme dhe të vazhdojmë me furnizimin e rregullt të popullatës e cila furnizohet nga Impianti në Shipol.
Duke iu kërkuar ndjesë për këtë situatë të pakëndshme, kërkojmë mirëkuptimin tuaj!”, thuhet në njoftimin e Ujësjellësit Mitrovica.
