I ftuat në emisionin “Ditari” në Tëvë1, anëtari i PSD-së, Lisjan Perolli thotë se ky takim ka ndodhur, mirëpo sipas tij, nuk kanë dashur që ta bëjnë publik.
“E kemi paralajmëruar që ishte një takim në mes të Trandafilovës dhe zotit Kurti në hotel Sirus… Ne besojmë që po ka pasur takim…Besojmë që nuk kanë dashur që ai takim të jetë publik, por sido që të jetë edhe nëse nuk ka ndodhur ai takim ka ndodhur takimi sot, pra institucionet e Kosovës, Ministria e Drejtësisë po vendos që ta takojë këtë gjykatëse edhe ta legjitimojë prezencën e saj edhe në opinionin publik sepse nuk mund ta harrojnë që Trendafilova po tenton ta normalizojë këtë, gjykata është e zhytur në skandale dhe përpos që po tenton të njollosë luftën çlirimtare të UÇK-së ajo tashmë është edhe në shkelje të drejtave të njeriut siç ka raportuar IKD në raportin e saj për gjykata”, tha ai.
Tutje Perolli tregoj arsyet se pse Trendefilova e ka anuluar vizitën e saj pas paralajmërimit të PSD-së për protestë.
“Besojmë që janë dy arsye që zonjës Trendafilova dhe Gjykatës Speciale nuk i konvenon një protestë e tillë. E para është sepse për ta shtruar vetën dhe për të qenë legjitim në opinionin publik të Kosovës i duhet qetësia dhe së dytë tashmë ka zëra edhe në nivel ndërkombëtar që po e kritikojnë Gjykatën Speciale”, tha Perolli.
Ndërkohë sot gjatë ditës Tëvë1 ka kontaktuar me Dhomat e Specializuara lidhur me pretendimet e kryetarit të Partisë Socialdemokrate, Dardan Molliqaj se kryeministri, Albin Kurti është takuar fshehurazi me Kryetaren e Gjykatës Speciale, Ekaterina Trendafilova. Në përgjigjen e tyre është mohuar një takim i tillë dhe është demantuar deklarata e Molliqaj.
“Jo, kryetarja e Gjykatës Speciale, Trendafilova nuk është takuar me kryeministrin, Albin Kurti”, thuhej në përgjigje./Teve1.info/
