Protestuesit që ishin në numër të vogël me pankarta “Nuk dua të jetoj në geto” dhe “Askush nuk është i sigurt” kundërshtuan politikat e Beogradit.
Kryetari i kësaj iniciative, Aleksandar Arsenijeviç tha para protestuesve se kundërshtojnë prezencën e policëve kosovarë atje.
“Kemi dy armiq: frika dhe defetizmi. Të dyja çojnë kah një qëllim, ai është shpërngulja. Por, unë e them këtu se ne nuk do të largohemi askund prej këtu dhe se ne do të luftojmë për të drejtat dhe jetesën tonë në Kosovë. I pamë edhe pamjet në Shtërpcë dhe sulmeve etnike në Gjilan. Kërkojmë që policia speciale e armatosur deri në dhëmb të largohet nga veriu. Ai tha se kërkon nga Prishtina zyrtare që t’i publikojë pamjet e kamerave e të shihet se sa është e nevojshme që të shtihet me armë në disa raste në veri. E dëgjuam presidentin Vuçiq se është i gatshëm të pranojë një marrëveshje e ne nga ky vend i çojmë mesazh se frika dhe defetizmi nuk janë zgjidhje. Pa formimin e Asociacionit serb nuk ka nënshkrim të asnjë marrëveshje”, tha ai.
Ai u shpreh se pa formimin e Asociacionit, nuk mund të ketë marrëveshje përfundimtare dhe se në bisedime në Bruksel ata nuk po përfaqësohen denjësisht.
“Përderisa nuk formohet Asociacioni, vet përfaqësuesit tanë e kanë bërë të qartë kur dhanë dorëheqje, se pa asociacionin, nuk ka marrëveshje në Bruksel. Këtu po përhapet frika dhe me kënd të bisedosh thonë duhet të shpërngulemi, nuk duam luftë. Mesazhi për presidentin Vuçiq bashkësinë ndërkombëtare dhe z.Albin Kurtin, të cilët flasin në emrin tonë është se në ato bisedime askush nga serbët e këtushëm nuk merr pjesë”
Pas fjalimeve protestuesit u shpërndan të qetë, ndërsa nuk u regjistrua asnjë incident.
Kujtojmë se kundër presidentit serb dhe Listës Serbe një protestë u mbajt edhe në fillim të janarit duke i akuzuar për tradhti kombëtare.
Pjesëtarët e Policisë së Kosovës së bashku me ata të EULEX-it u përkujdesen për mbarëvajtjen e protestës.
Kronika e realizuar nga Lindrit Zejnullahu
