Në një lidhje direkte në Tëvë 1, Çitaku bën të ditur se zyrtari policor është jashtë rrezikut për jetë, por shkak i lëndimit që ka pësuar në gishtërinjë, pritet që t’i nënshtrohet intervenimit kirurgjik.
“Nga rasti që ju përshkruat, në orën 18:35 ka arritur autoambulanca me një zyrtar të plagosur, nga përleshja që ka ekzistuar në Prizren. Gjendja e tij nuk është rrezik për jetë, ka të bëj me një lëndim shkaktuar nga mjeti prerës, thika, që kryesisht është pengesë në lëvizjen e gishtërinjëve. Tash është duke u përgatitur për intervenim dhe besoj se do të lëshohet në shtëpi. Nuk është diçka rrezik për jetë”, tha ai.
Gjatë ditës së sotme, një 36-vjeçar ka therur me thikë tre policë zyrtarë në lagjen Dardania në Prizren. Sipas Policisë, rasti ka ndodhur para orës 17:00, derisa familjarët kanë kërkuar ndihmë meqenëse tashmë i dyshuari nuk i ka marrë disa ilaçe qetësimi.
Tre policët zyrtarë janë dërguar fillimisht në spitalin e Prizrenit, njëri është liruar, njëri vazhdon të trajtohet në spitalin e Prizrenit, ndërkaq tjetri është transferuar në QKUK. /Teve1.info/