Presidentja e Kosovës, Vjosa Osmani ka thënë se pret që zotimet e aleatëve të Kosovës të mbahen për anëtarësimin e vendin në organizata ndërkombëtare pas dakordimit në Ohër nga Kosova dhe Serbia për zbatimin e aneksit të Planit Evropian.
Osmani përmes një deklarate për media ka thënë se në takimin e së shtunës Kosova ishte e vetmja që u tregua konstruktive.
“Tani që u dakordua edhe aneksi i marrëveshjes bazë dhe Kosova u dëshmua të jetë e vetmja palë në dialog që u tregua konstruktive dhe e interesuar në paqe e stabilitet, pres të realizohen zotimet e aleatëve tanë në lidhje me anëtarësimin e Kosovës në organizata ndërkombëtare si dhe për njohje nga shtetet jonjohëse”, thuhet në deklaratë,raporton teve1.info.
Presidentja ka thënë se Serbia do të vazhdojë të shkel marrëveshjet e arritura.
“Nga Serbia nuk kam asnjë pritje. Ata do të vazhdojnë të shkelin marrëveshjet e dakorduara, siç kanë bërë këto 12 vjet. Nëse dëshirojmë zbatim të mirëfilltë të marrëveshjes duhet të ndryshohet qasja akomoduese ndaj regjimit të Serbisë dhe të penalizohet secili tentim i tyre për destabilizim të situatës në terren, si dhe jokonstruktiviteti e bllokada e tyre e vazhdueshme”, thuhet në deklaratën e Osmanit.
Të shtunën pas një takimi që zgjati 12 orë ndërmjet kryeministrit të Kosovës Albin Kurti dhe presidentit serb, Aleksander Vuçiq në ndërmjetësimin e emisarëve të BE-së, Josep Borrell njoftoi se palët kanë arritur marrëveshje për zbatimin e ankesit të Planit Evropian./teve1.info/
