Zyra e Rregullatorit të Energjisë ka konfirmuar këtë, duke theksuar edhe komunikimet e vazhdueshme më të gjitha palët e përfshira, Elektroserver, KEDS, KESCO E KOSTT.
“KOSTT ka dërguar me kohë tek Elektrosever të gjitha marrëveshjet e domosdoshme teknike për të operuar në tregun e energjisë në Kosovë, siç janë: Marrëveshjen për Aderim në Rregullat e Tregut dhe Marrëveshjen mbi detyrimet e balancimit. Ndërsa KEDS ka dorëzuar marrëveshjen e Kyçjes, pritjet janë që KEDS të dërgojë tek Elektrosver edhe marrëveshjen komercialë për ofrimin e shërbimeve. Pavarësisht progresit të punëve sipas afateve nga KOSTT, KEDS dhe KESCO në finalizimin e marrëveshjeve të sipërpërmendura është vërejtur se ka ngecje në finalizimin e tyre nga Elektrosever”, ka sqaruar ZRrE.
Ndërkaq, nga KOST-i kanë thënë se janë duke vepruar në përputhje me obligimet që rrjedhin nga marrëveshja.
“KOSTT thekson rëndësinë që të gjitha palët përgjegjëse të implementojnë Udhërrëfyesin, për të siguruar normalizimin e situatës për pagesën e energjisë elektrike të konsumuar në pjesën veriore të Kosovës si dhe krijimit të kushteve për investime në asetet e vjetruara energjetike në pjesën veriore të Sistemit të Transmetimit të Kosovës”, tha Zana Bajrami Rama, zëdhënëse e KOSTT-it.
Qëndrim për këtë situatë, nuk ka dhënë Qeveria e Kosovës, e as Bashkimi Evropian, që ishte ndërmjetësuesi i kësaj marrëveshje.
Me këtë trend të veprimeve, sipas njohësit të energjetikës Vezir Rexhepi, kjo marrëveshje është afër dështimit.
Në rast të mospërmbushjes së detyrimeve, ZRRE-ja, obligohet që t’ia revokojë licencën e operimit Elektroserverit.
Udhërrëfyesi i dakorduar më 21 qershor, ndër të tjerash specifikon tarifimin e rrymës elektrike në komunat veriore.
Kronika e gazetares Florijeta Dernjani.
