Në këtë fazë të dialogut, jo rrallë diskutohet për mundësinë që Kosova pas nënshkrimit të marrëveshjes eventuale me Serbinë, të marr disa garanci nga BE-ja për njohjen e saj nga pesëshja mosnjohëse e pavarësisë së Kosovës.
Madje gjatë kësaj jave edhe emisari Miroslav Lajcka kishte vizituar pesë vendet mos-njohëse për të cilat tha se i ka informuar për ecurinë e dialogut.
Profesori Universitar Abit Hoxha thotë se disa nga pesë vendet e BE-së raportin e tyre me Kosovën e kanë lidhur me dialogun e Brukselit.
“Por së paku dy prej këtyre vendeve të Unionit Evropian kanë pas indikacione të qarta se pas një marrëveshje me Serbinë, pra të Kosovës me Serbinë do të rishqyrtohet pozicioni i tyre. Do me thënë Greqia dhe Sllovakia, por njëkohësisht Spanja ka indikacione të njëjta dhe Rumania. Kështu që mund të ndodh, por kjo çështje nuk varet ekskluzivisht nga puna e Lajcakut”, thotë Hoxha.
Është thënë po ashtu që Kosova po kërkon garanci që nënshkrimi i marrëveshjes do t’i sjell edhe këto njohje, por Arbër Fetahu nga Grupi për Studime Juridike dhe Politike, thotë se një gjë e tillë nuk mund të garantohet në këtë fazë.
“Nuk mund të kemi garanc 100% dhe të shkruar në letër që thuhet se ky vend ose ai vend tjetër ose kjo pesëshe do ta njoh Kosovën nga momenti që nënshkruhet marrëveshja Kosovë – Serbi. Sidoqoftë me dinamikën e politikës së jashtme dhe politikës në përgjithësi një zhbllokim i raporteve Kosovë – Serbi dhe një nënshkrim i një marrëveshje, një baze për normalizim mund të sjell ndryshim të qëndrimeve të vendeve që edhe ndaj Kosovës e kanë një qëndrim ndoshta më pak armiqësor dhe kanë më pak si ta themi ndasi edhe me Kosovën në kuptimin e mbështetjes për pavarësinë e saj”, deklaroi Fetahu.
Pavarësisht pritjeve në Prishtinë, ditëve të fundit, diplomatë ndërkombëtarë, mes tjerash kanë deklaruar se është e pamundur që t’i garantohet Kosovës njohja nga pesë vendet e BE-së, ku bëjnë pjesë, Spanja, Greqia, Sllovaki, Rumania dhe Qipro.
Kronika e realizuar nga gazetari Valmir Gallopeni.
