I ftuar në emisionin “Ditari” në Tëvë1, Perolli tha se po të kalonte ligji për tërheqjen e kursimeve pensionale, një personi do t’i duheshin vite për t’i kthyer prapë ato para në Trust.
Sipas tij, një njeri i cili është në pension do t’i hiqeshin 2.2 vite mesatarisht nga pensioni.
“Ne besojmë që tërheqja e parave të Trustit nga ana e qytetarëve është zgjidhje afatshkurtër dhe në fakt nuk është zgjidhje fare për krizën afatgjatë me të cilën këta qytetarë janë përballur. Po të kishe kaluar ky ligj do të nënkuptonte që mesatarja e një personit që i tërheq paret nga Trusti do t’i duheshin vite për t’i kthyer prapë ato para në Trust e për një njeri i cili është në pension do t’i hiqeshin 2.2 vite mesatarisht nga pensioni. Pra në afatgjatë qytetarët do të dëmtoheshin në të ardhmen e tyre”, tha ai.
Tutje Perolli akuzoi Qeverinë Kurti për mos marrjen e hapave të duhur për t’i ndihmuar qytetarët teksa shumica nga subvencionet që Qeveria i ka dhënë për qytetarët më shumë nga kjo kanë përfituar bizneset.
“Përtej çështjes së Trustit, përtej kësaj zgjidhje që nuk është vërtetë zgjidhje, pyetja do të ishte çka po bën në të vërtetë Qeveria për ta zbutur krizën. Deri më tash e kemi parë që kjo Qeveri dy herë radhazi ja dhënë subvencione për qytetarët të cilat më shumë u kanë shkuar në xhep bizneseve sesa qytetarëve”, tha Perolli.
Ndërkohë pak çaste më parë Kuvendi i Kosovës nuk e ka miratuar Projektligjin për tërheqjen e 30% të kursimeve pensionale. Pro votuan 42 deputetë, ndërsa kundër ishin 55 nga Lëvizja Vetëvendosje. I njëjti kishte dështuar të votohet më 23 qershor të vitit 2022. /teve1.info/
