Sipas fotografive të siguruara nga Tëvë 1, momentalisht në sheshin e veriut nuk ka patrulla të EULEX-it dhe KFOR-it.
Nga atje raportohet se ka edhe ndërprerje të energjisë elektrike në tri lagje të Mitrovicës së Veriut.
Ndryshe sot, në një përgjigje për Tëvë1, nga EULEX-i kanë thënë se që nga 16 nëntori, në komunat veriore po patrullojnë në këmbë edhe oficerët e njësisë policore të formuar të EULEX-it dhe njësisë policore të formuar rezervë.
“EULEX-i tashmë ka rritur ndjeshëm patrullat e lëvizshme të zbulimit të Njësisë së Formuar të Policisë dhe Njësisë së Formuar të Policisë Rezervë në veri të Kosovës në koordinim me Policinë e Kosovës dhe KFOR-in, në mënyrë që të monitorojë nga afër të gjitha zhvillimet që mund të ndikojnë në sigurinë e Kosovës, si dhe në sigurinë e të gjitha komunitetet në Kosovë. Që nga 16 nëntori, në komunat veriore po patrullojnë në këmbë edhe oficerët e njësisë policore të formuar të EULEX-it dhe njësisë policore të formuar rezervë”, kanë thënë EULEX-i.
Po ashtu, të njëjtit kanë bërë të ditur se mund të plotësojnë vetëm pjesërisht vakuumin e sigurisë që është krijuar në veri pas dorëheqjes së pjesëtarëve të Policisë së Kosovës.
Sipas EULEX-it, mbi 100 pjesëtarë të tyre po patrullojnë në Jarinjë dhe Bërnjak.
Situata në veri të vendit është tensionuar pas vendimit të Qeverisë së Kosovës për targat. Sipas këtij vendimi, nga 21 nëntori do të ketë gjoba në shumën prej 150 euro, për qytetarët serbë që nuk ndërrojnë targat ilegale në RKS. /Teve1.info/
https://teve1.info/lajmet/mbi-100-pjesetare-te-eulex-it-po-patrullojne-ne-veri-te-kosoves/
