Ministrja e Arsimit, Arbërie Nagavci ka thënë se do të ishte e mirëseardhur rritja e numrit të bursave për studentët kosovarë në Japoni.
Përmes një postimi në Facebook, Nagavci ka njoftuar se ka zhvilluar takim me të ngarkuarin me punë të Ambasadës Japoneze në Prishtinë Keisuke Yamanaka.
“Japonia ka prezencë të vazhdueshme përmes projekteve në Kosovë, ndaj mbështetja në fushën e arsimit, respektivisht në shtimin e numrit të bursave për studentët kosovarë që duan të studiojnë në Japoni, do të ishte e mirëseardhur”, ka shkruar ajo, transmeton tëvë1.info.
Sipas saj, Yamanaka riafirmoi angazhimin e tij për të promovuar më tej marrëdhëniet miqësore mes Japonisë dhe Kosovës.
“Z. Yamanaka riafirmoi angazhimin e tij për të promovuar dhe forcuar më tej marrëdhëniet miqësore mes Japonisë dhe Kosovës. Japonia ka ndihmuar dhe sërish do të mbështesë projektet që synojnë avancimin në edukim, për çka u shpreha falënderuese”, tha më tej Nagavci.
Postimi i plotë
Prita në një takim miqësor, të Ngarkuarin me punë të Ambasadës Japoneze në Prishtinë, z. Keisuke Yamanaka.
Z. Yamanaka riafirmoi angazhimin e tij për të promovuar dhe forcuar më tej marrëdhëniet miqësore mes Japonisë dhe Kosovës. Japonia ka ndihmuar dhe sërish do të mbështesë projektet që synojnë avancimin në edukim, për çka u shpreha falënderuese.
Japonia ka prezencë të vazhdueshme përmes projekteve në Kosovë, ndaj mbështetja në fushën e arsimit, respektivisht në shtimin e numrit të bursave për studentët kosovarë që duan të studiojnë në Japoni, do të ishte e mirëseardhur.
Biseduam për përvojat e suksesshme të të rinjëve tanë në arsimin e lartë dhe për bashkëpunimin e mëtejshëm dhe të shtuar në fushën e arsimit. Diskutuam për gjendjen aktuale në arsim, për vështirësitë që ka sjellë pandemia në procesin mësimor, për të arriturat dhe punët që janë duke u bërë në MASHTI për të përmirësuar cilësinë dhe për të siguruar gjithëpërfshirje në arsim.
Në angazhimin tonë për realizimin e projekteve konkrete dhe përmirësimin e cilësisë në fushën e arsimit, bashkëpunimi dhe ndihma e miqve është e mirëseardhur.
