Banorët e lagjes “Hasan Prishtina” në Podujevë, nuk furnizohen me ujë të pijes nga ujësjellësi rajonal.
Me këtë problem ata ballafaqohen tash e sa vjet.
Fahruk Musliu tregon se me çfarë vështirësish e siguron ai ujin për familjen e tij.
“Une për veti marr me kanta, baj prej poshtë të migjallatë ose dikun”, thotë ai.
Për mungesën e ujit të pijes ankohet edhe Rexhep Musliu. Ai thotë se disa herë u është drejtuar institucioneve përkatëse, por nuk ka marrë përgjigje.
“Të zgjidhet ky problem sa ma shpejt se edhe kam qenë në ujësjellës në Podujevë edhe kanë thanë zoti qare ju baft, s’kem çka ju bajm”, thotë Musliu.
Në dijeni për hallin e banorëve të kësaj lagjeve është edhe Drejtori për Shërbime Publike- Bahri Selimi.
Ai thotë se në bashkëpunim me Ujësjellësin Rajonal “Prishtina”, Komuna e Podujevës është në proces e sipër të zgjedhjes së këtij problemi.
“Jemi duke vendosur një gyp, i cili vije nga Lagjia e Dëshmorëve deri te rezervari i ujësjellësit, ktu ku është problemi i furnizimit dhe shpresojmë se me vendosjen e këtij gypi rezervari do të ketë ujë të mjaftueshëm”, theksoi Selimi.
Në Komunën e Podujevës ka edhe lagje të tjera të cilat kanë mungesë të ujit të pijes dhe banorët presin nga autoritetet kompetente që t’u bëjnë zgjidhje në muajt në vazhdim.
Kronika e realizuar nga gazetarja Flakë Ajeti.
