Muhaxhiri në emisionin “Info Nata” në Tëvë1, tha se liderët synojnë që të faktorizohen me qëndrimet e tyre paraprake, posaçërisht në raport me amerikanët dhe evropianët.
“Do të arrihet një marrëveshje, por është i njohur ky stili i politikës ku liderët synojnë që të faktorizohen me qëndrimet paraprake që ta rrisin staturën e tyre, posaçërisht në raport me amerikanët dhe evropianët, duke maksimalizuar pozicionin e tyre”, ka deklaruar ai.
Sipas tij, ka gjasa që të dielën në mbrëmje të arrihet një marrëveshje, pasi të hënën mund të kishte edhe ndonjë zhvillim negativ.
“Më shumë ka gjasa të dielën në mbrëmje për arsye se të hënë mund të ketë edhe ndonjë zhvillim negativ. Por aty nuk u përcaktua (takimi mes Kurtit e Vuçiqit), ishte e diela në mbrëmje ose e hëna paradite, por nëse të hënë veç fillon afati atëherë mund të ndodhë diçka. Kështu që më logjike do të ishte të dielën në mënyrë që të hënën edhe përfaqësuesit e policisë dhe qytetarët ta kenë më të qartë se si është gjendja”, tha Muhaxhiri.
Sot u raportua se kryeministri i Kosovës, Albin Kurti dhe presidenti serb, Aleksandar Vuçiq janë ftuar për takim në Bruskel për ditën e diel. /Teve1.info/
