Sipas një komunikate të lëshuar nga PMB, në kuadër të fushatës: “Çdo plumb e ka një shënjestër Festo me zemër, jo me armë”, mori pjesë zëvendësministri i Punëve të Brendshme dhe kryesuesi i Komisionit për Armët e Vogla dhe të Lehta, Blerim Gashani, kryetari i Komunës së Hanit të Elezit, Mehmet Ballazhi dhe Zëvendës Përfaqësuesi i Përhershëm i UNDP-së në Kosovë, Niels Knudsen.
“Me këtë rast, Koordinatori Kombëtar për AVL-të, njëherit zëvendësministri i Punëve të Brendshme, z. Blerim Gashani, theksoi trafikimi dhe zotërimi i paligjshëm i armëve, krimet me armë edhe pse paraqiten në rënie çdo vit, ende shfaqen si kërcënim për jetën njerëzore dhe rendin e sigurinë publike në Kosovë”, thuhet në komunikatë.
Ai tha se Policia e Republikës së Kosovës në baza vjetore konfiskon rreth 1 mijë e 500 armë ilegale të llojeve të ndryshme, ndërsa institucionet e Republikës së Kosovës janë duke u angazhuar në baza ditore që Kosovën ta bëjmë një vend me një mjedis të sigurt dhe me kapacitete të qëndrueshme, për të parandaluar, identifikuar, kontrolluar dhe dënuar keqpërdorimin, trafikimin dhe zotërimin e paligjshëm të armëve të zjarrit.
Ndërsa zëvendës-përfaqësuesi i Përhershëm i UNDP-së në Kosovë, z. Niels Knudsen, theksoi çdo ditë rikujtojmë se armët, krimi dhe dhuna përbëjnë kërcënim edhe në shoqëritë më paqësore.
“Në Kosovë, UNDP-ja ka qenë aktive në Kontrollin e Armëve të Vogla të Lehta (SALË) që nga viti 2008 përmes projekteve të ndryshme. Për ne, është nder që jemi partneri juaj për gati 15 vjet, duke punuar së bashku me Ministrinë e Punëve të Brendshme, Policinë e Kosovës dhe akterët dhe institucionet tjera të zbatimit të ligjit në nivel lokal dhe qendror – në ndërtimin dhe sigurimin e një mjedisi të sigurt për popullin e Kosovës.”, theksoi Knudsen.
Fushata “Çdo plumb e ka një shënjestër-festo me zemër jo me armë”, ka filluar me 6 nëntor me një manifestim që është mbajtur njëkohësisht në Prishtinë dhe Shkup.
Aktivitete të tilla njëkohësisht janë duke u mbajtur edhe në Maqedoninë e Veriut në zona afër brezit kufitar.
