Kuvendi i Kosovës e miratoi Ligjin për Byronë Shtetërore për Verifikimin dhe Konfiskimin e Pasurisë së Pajustifikueshme, raporton teve1.info
Ministrja e Drejtësisë Albulena Haxhiu, i ftoi deputetët ta votojnë këtë projektligj duke thënë se nuk është qëllim kundër një individi por siç tha ajo, është kërkesë e qytetarëve të Kosovës.
“Prandaj unë sot pres që pavarësisht dallimeve që mund të kemi për çështje ideologjike, për politika ditore të bëhemi bashkë për një çështje që është edhe kërkesë e qytetarëve të Kosovës.
I bëjë thirrje të gjitha Grupeve Parlamentare që ta mbështesin sepse është një projektligj i rëndësishëm”, tha Haxhiu.
Këtë projektligj e mbështeti Lidhja Demokratike e Kosovës.
Deputetja e kësaj partie Doarsa Kica Xhelili, tha se e mbështesin Byronë që të bëhet por jo të politizohet.
Ndërsa deputeti i PDK-së, Hajdar Beqa, tha se kjo parti ka vërejtje në këtë Ligj, andaj paralajmëroi se nëse miratohet, i njëjti do të dërgohet në Gjykatë Kushtetuese.
