Nga LVV-ja përmes kësaj video kanë thënë se vetëm në aksin Kievë-Zahaq të rrugës Prishtinë – Pejë ishte planifikuar “një plaçkitje e madhe e buxhetit të vendit. 240 milionë euro do t’i kushtonte Kosovës hajnia në emër të ndërtimit e shpronësimit”.
Sipas kësaj partie, Qeveria Kurti e parandaloi një gjë të tillë dhe ky ndërtim nuk do të kushtojë më shumë se 90 milionë euro.
“Ministria e Infrastrukturës është gjetur me 182 milionë euro borxhe të shpronësimeve, ndërkaq buxheti i gjetur që ka qenë i planifikuar për kthimin e këtij borxhi ka qenë vetëm 2 milionë euro. Ideja qartazi ka qenë aplikimi i kamatës prej 7% në vonesa, që të zhvatet për vjet e më shumë buxheti i shtetit. Këtë nuk e arritën sepse i ndalëm dhe e kthyem situatën në 0 për t’ia filluar së mbari. Pa keqpërdorime dhe devijime. Pa haraç e kurdisje tenderësh. Me kosto të arsyeshme dhe cilësi të lartë.”, thuhet në videon e publikuar nga LVV.
Javë më parë Lëvizja Vetëvendosje publikoi një video duke sulmuar qeveritë e kaluara dhe sindikatat. Në videon e publikuar në “Facebook”, target i Vetëvendosjes ishin liderët e opozitës: Memli Krasniqi, Lumir Abdixhiku e Ramush Haradinaj si dhe Sami Lushataku. Në video ishin përmendur skandale të ndryshme të së kaluarës, ndër të tjera “terminalet doganore, vjedhja e dy milionë eurove nga Thesari i Kosovës, vjedhja e drogës nga terminalet doganore, si dhe shitja e tokave me 1 euro ari”. /Teve1.info/
https://teve1.info/lajmet/vetevendosje-me-nje-video-te-re-sulmon-opoziten-e-sindikatat/
