Ata kanë njoftuar qytetarët serbë se targat KM mbeten në përdorim dhe kur të skadojë afati i tyre, mund ta zgjasin regjistrimin përsëri, shkruan teve1.info
“Duam të informojmë qytetarët se të gjithë pronarët e automjeteve me targa KM do të mund të funksionojnë normalisht dhe kur të skadojë regjistrimi i tyre ekzistues do të mund të zgjasin vlefshmërinë e regjistrimit të KM si më parë. Prandaj, të gjithë pronarët e automjeteve me targa KM do të mund të përdorin dhe zgjasin regjistrimin për automjetet me targa KM pa ndërprerje”, thuhet në njoftimin e tyre në Facebook.
Nga Lista serbe thonë se kanë kërkuar që të mbesin targat KM, e jo të rritet numri i tyre.
“Targat ekzistuese mbeten dhe do të mund të vazhdohen, dhe të reja nuk do të lëshohen tani për tani. Kujtojmë se qëndrimi ynë ka qenë që të mbajmë targa KM, të mos ua heqim pronën qytetarëve, të mos shkruajmë penalitete dhe as t’u pamundësojmë lirinë e lëvizjes. Kemi kërkuar që të mbesin targat KM, jo të rritet numri i tyre”, bëjnë të ditur nga Lista serbe.
Kosova dhe Serbia të mërkurën mbrëma kanë arritur marrëveshje për targat. Sipas kësaj marrëveshjeje, Serbia nuk do lëshojë targa me emërtimet e qyteteve të Kosovës, e Kosova do të ndërpresë veprimet e mëtejshme në lidhje me riregjistrimin e automjeteve. /Teve1.info/
