48 vota ishin për, 7 kundër dhe tri deputetë abstenuan.
Njohësi i proceseve integruese, Fidan Ukaj ka thënë për teve1.info se për të njëjtën çështje eurodeputetët do të votojnë në Parlamentin Evropian, në një seancë plenare e cila pritet të mbahet së shpejti.
Pas kësaj, ambasadorët e BE-së duhet të votojnë me shumicë të thjeshtë për çështjen e liberalizimit të vizave.
Ukaj ka thënë se pas ambasadorëve, radha është e Këshillit të Ministrave.
“Edhe Këshilli i Ministrave e miraton me shumicë të thjeshtë liberalizimin”, ka thënë Ukaj.
Më pastaj, ai ka sqaruar se akti ligjor nënshkruhet nga institucionet kryesore të BE-së.
“Akti nënshkruhet nga Këshilli, Komisioni dhe Parlamenti”, ka shtuar ai për teve1.info
Tutje njohësi i integrimeve ka deklaruar se akti publikohet në gazetë zyrtare duke përfshirë datën e hyrjes në fuqi. Pas hyrjes në fuqi, kosovarët mund të lëvizin pa viza në zonën Schengen.
Ambasadorët e vendeve të BE-së janë dakorduar që lëvizja pa viza për Kosovë, të zbatohet nga data e fillimit të funksionimit të Sistemit Evropian të Informacionit dhe Autorizimit të Udhëtimit (ETIAS) dhe në çdo rast jo më vonë se 1 janar 2024.
