Në një konferencë për media, anëtari i kryesisë së LDK-së, Xhafer Tahiri, tha se ndërlidhja me kryeministrin Kurti është pjesa më shqetësuese që duhet të adresohet menjëherë, përcjell teve1.info
“Prandaj, Lidhja Demokratike e Kosovës kërkon që këto dyshime shqetësuese që rëndojnë mbi imazhin e kryeministrit dhe të Kosovës të adresohen menjëherë nga Qeveria Kurti. A janë të vërteta deklarimet e hulumtimet nga gazeta sllovene?! A janë përdorur paratë e GEN-it për të investuar në fushatën e kryeministrit Kurti?!A përdoren këto para për të paguar njerëz që të përbaltin kundërshtarë të kryeministrit Kurti në komente online, në media, dhe në organizata të tjera ku kanë mundur të investohen këto para?!”, deklaroi ai.
Tahiri shtoi se “këto janë pyetje legjitime që sot i shtron Lidhja Demokratike e Kosovës dhe janë pyetje legjitime të çdo qytetari të Kosovës”.
Ambasadori i Kosovës në Kroaci, Martin Berishaj, është diskutuar në mediat sllovene nën dyshimin se ishte përfshirë në pastrim parash.
Sipas raportimeve, një kompanie të tij në Mal të Zi i janë bartur afro 600 mijë euro nga dega e kompanisë GEN në Beograd, e më pas ato u janë dhënë kesh politikanit slloven Robert Golob. /Teve1.info/
