Të dielën, pritet që kryeministri i Kosovës, Albin Kurti të jetë përballë presidentit të Serbisë, Aleksander Vuçiq në Bruksel.
Kështu kanë bërë të ditur zëdhënësi i ekzekutivit kosovar, Përparim Kryeziu.
“Me shumë gjasë nesër do të ketë një takim në Bruksel. Kur të konfirmohet, do të ju njoftojmë”, tha Kryeziu.
Sipas njohësit të rrethanave politike, Artan Muhaxhiri ka gjasa që të dielën në mbrëmje të arrihet një marrëveshje, pasi të hënën mund të ketë edhe ndonjë zhvillim negativ.
“Do të arrihet një marrëveshje, por është i njohur ky stili i politikës ku liderët synojnë që të faktorizohen me qëndrimet paraprake që ta rrisin staturën e tyre, posaçërisht në raport me amerikanët dhe evropianët, duke maksimalizuar pozicionin e tyre”, deklaroi ai.
E analisti Tomorr Avdia, thotë se në këtë fazë bisedime me ndërkombëtarët kanë pasur edhe diplomacia kosovare dhe partitë opozitare.
E për këtë takim të thirrur nga Bashkimi Evropian, shefi i ekzekutivit, Albin Kurti, njoftoi se të premten ka zhvilluar bisedë telefonike me Nënsekretarin amerikan të Shtetit, Derek Chollet.
“Një bisedë telefonike e sinqertë dhe e rëndësishme me nënsekretarin e Shtetit Derek Chollet për domosdoshmërinë e një marrëveshjeje për normalizimin e plotë me Serbinë me qendër njohjen reciproke, me fokus situatën e sigurisë në Kosovë së bashku me sundimin e ligjit”, ka bërë të ditur Kurti.
Edhe Chollet me anë të një postimi në Twitter ka thënë se duhet të shmanget përshkallëzimi i mëtejshëm i situatës me Serbinë.
“Bisedova me kryeministrin e Kosovës, Albin Kurti për shmangien e përshkallëzimit të mëtejshëm: shtyrja e gjobave të targave, mbajtja e derës së hapur për kthimin e serbëve të Kosovës në institucione dhe fokusimi në dialogun për normalizim me Serbinë, rruga më e mirë për avancimin e integrimit evropian dhe euroatlantik të Kosovës”, ka deklaruar Chollet.
Të hënën, fillon faza e dytë e vendimit të ekzekutivit kosovar për targat ilegale.
Në këtë fazë parashihet gjobitja e të gjithë shoferëve serbë që nuk i kanë konvertuar targat nga KM në RKS.
Kronika e realizuar nga gazetarja Fetije Kamberi.
