Kurti këto deklarime i bëri gjatë një konference në Estoni, kur u pyet nga gazetarët atje nëse do të vazhdojnë tensionet për targat në veri të Kosovës.
“Jemi duke bërë çmos për ta mbajtur ligjshmërinë në njërën anë dhe sigurinë nga ana tjetër”, u shpreh Kurti.
Sipas tij, zëvendëskryeministri Besnik Bislimi është në komunikim të rregullt dhe intensiv me Brukselin për ta zgjidhur këtë çështje.
“9 mijë vetura janë me targa ilegale serbe, kjo është më pak se 10 për qind të veturave që serbët në Kosovë i kanë. Kështu që është një pakicë ekstreme brenda shumicës që po i refuzojnë këto targa. Kemi pas një dallim në qasje dhe sekuentim duke filluar vetëm me qortime dhe më pas me gjobat. Megjithatë Beogradi i urdhëroi të gjithë serbët që janë në institucionet e Kosovë të japin dorëheqje kolektive. Disa e kanë bërë këtë. Unë ju bëjë thirrje se institucionet nuk janë të këtij kryeministri por institucionet janë publike”, u përgjigj Kurti.
Kurti shtoi se është optimist në këtë çështje por tha se qasja e Beogradit ka qenë mjaft destruktive kurse theksoi se në ditët e ardhshme do të shihet se sa të suksesshëm do të jenë në negociata të reja.
“Kemi nevojë për marrëveshje me njohje reciproke me Serbinë”, përfundoi Kurti.
