Kryeministri i vendit, Albin Kurti dhe ambasadorja e Finlandës në Kosovë, Pia Stjernvall kanë zhvilluar sot takimin lamtumirës, me rastin e përfundimit të mandatit të ambasadores.
Në njoftimin për media nga Zyra e Kryeministrit është bërë e ditur se gjatë këtij takimi u vlerësuan marrëdhëniet miqësore mes Kosovës dhe Finlandës, transmeton tëvë1.info.
Kryeministri dhe ambasadorja theksuan potencialin e bashkëpunimit në mes dy shteteve për zhvillimin social dhe ekonomik.
Ambasadorja Stjernvall shprehu vlerësimin e saj për bashkëpunimin me qeverinë dhe i dëshiroi kryeministrit rezultate të mira në qeverisjen e tij.
“Ajo përsëriti gatishmërinë e Finlandës për t’i ofruar ndihmë shtetit të Kosovës në ngritjen e kapaciteteve për arritjen e objektivave. Kryeministri Kurti e falënderoi ambasadoren Stjernvall për mbështetjen e pareshtur që shteti i Finlandës i ka dhënë Kosovës dhe popullit të saj”, thuhet në njoftim.
Kurti u shpreh mirënjohës për bashkëpunimin përgjatë gjithë mandatit të saj në Kosovë.
