Përmes një statusi në Facebook, Kurti ka shkruar se me Kryetarin e Parlamentit të Republikës së Estonisë, Jüri Ratas dhe Kryetarin e Komisionit të Punëve të Jashtme të Parlamentit, Andres Sutt, ka diskutuar për qeverisjen digjitale.
“Avancimi i bashkëpunimit në fusha të ndryshme, me theks te qeverisja digjitale dhe qëndrimet e dy qeverive mbi zhvillimet dhe sigurinë në kontinentin e Evropës, ishin pjesë qendrore e diskutimeve në takimet që patëm bashkë me Zëvendëskryeministren e Republikës së Kosovës, Emilija Rexhepi, Ministrin e Kulturës, Rinisë dhe Sportit, Hajrulla Çeku, ambasadoren jo rezidente të Kosovës në Estoni, Shkëndije Geci-Sherifi dhe këshilltarin tim, Lulëzon Jagxhiu”, ka shkruar Kurti.
Ai tha se ka takuar edhe Kryeministren e Republikës së Estonisë, Kaja Kallas.
“Shpreha mirënjohjen për mbështetjen e vazhdueshme që Estonia i jep Kosovës dhe gatishmërinë për thellim të bashkëpunimit ekonomik dhe tregtar. Kryeministrja Kallas ofroi mbështetjen e plotë për Kosovën në rrugën tonë euroatlantike dhe në procesin e liberalizimit të vizave për qytetarët tanë”, u shpreh Kurti.
Sipas Kurtit, ai ëhstë takuar edhe me Ministrin e Punëve të Jashtme të Estonisë, Urmas Reinsalu, dhe Drejtorin Ekzekutiv të Akademisë Estoneze për Qeverisje Elektronike (eGA) Hannes Astok.
