Komiteti për Punët e Jashtme i Parlamentit Evropian (AFET) do të diskutojë për Kosovën, në mbledhjen e nesërme.
Raporti i Komisionit Evropian për Kosovën do të jetë temë diskutimi, bëhet e ditur në faqen zyrtare të AFET.
Raportuese do të jetë Viola von Cramon. Raporti më pas do të votohet më 26 prill në Komisionin Evropian.
Në Raportin e Progresit për Kosovën, vendi veçohet për disa përparime që ka bërë, por, në të shumtën e rasteve, progresi thuhet se ka qenë i kufizuar dhe se duhet të punohet më shumë.
Aty thuhet se liberalizimi i vizave për Kosovën është çështje urgjente. Komisioni Evropian mbetet në qëndrimin se Kosova i ka përmbushur të gjitha kriteret për liberalizimin e vizave.
Sa i përket dialogut për normalizimin e marrëdhënieve ndërmjet Kosovës dhe Serbisë, në draft-raport thuhet se ka pasur takime të rregullta në Bruksel në nivel të kryenegociatorëve, ndërkaq përmendet edhe pajtimi për udhërrëfyesin e zbatimit të marrëveshjeve të energjisë dhe për udhëtimin vetëm me letërnjoftime ndërmjet Kosovës dhe Serbisë.
Megjithatë, nga të dyja vendet kërkohet angazhim urgjent për arritjen e një marrëveshjeje gjithëpërfshirëse, që do t’i normalizonte marrëdhëniet ndërmjet tyre.
Kurse sa i përket luftimit të korrupsionit, në draft raport thuhet se ka pasur përparim të lehtë.
Komisioni po ashtu ka theksuar se Kosova ka pasur stabilitet politik, por nuk e ka vlerësuar pozitivisht punën e Kuvendit të Kosovës.
Kjo sipas raportit ka ndodh për shkak të menaxhimit të dobët të agjendës legjislative, por edhe për shkak se, siç thuhet, deputetët e opozitës kanë abstenuar nga votimi, për të penguar miratimin e vendimeve.
