Këtë deklarim, i akuzuari Osmani e dha në shqyrtimin fillestar të hënën në Gjykatën Themelore në Mitrovicë, raporton “Betimi për Drejtësi”.
Ndryshe, prokurori Njazi Rexha, pas leximit të aktakuzës bëri përmirësimin e kualifikimit ligjor, në vend të nenit 216 par.2, të KPRK-së së vitit 2019, duhet të jetë neni 219 par.2, të KPRK-së së vitit 2013, pasi ky kod ka qenë në fuqi në kohën kur është kryer vepra penale.
I akuzuari Osmani deklaroi se e pranon fajësinë për veprën penale që i vihet në barrë, duke shtuar se ka mundur të ndodhë për shkak të neglizhences dhe lodhjes pasi të njëjtën ditë ka punuar rreth 24 orë.
“Ndoshta ka qenë puna që iu kam besuar më shumë se që duhet anëtarëve të komisionit, më vjen keq për këtë që ka ndodhur, premtoj se nuk do ta përsëris asnjëherë”, deklaroi Osmani.
Ndërsa, prokurori Njazi Rexha i propozoi gjykatës që të pranojë pranimin e fajësisë nga i akuzuari, pasi i njëjti fajësinë e pranon në mënyrë vullnetare, pa presion, në konsultim me mbrojtësin e tij, e në mbështetje me provat që gjenden në shkresat e lëndës.
Po ashtu, edhe mbrojtësi i të akuzuarit Osmani, avokati Sabit Pllana i propozoi gjykatës që të pranojë pranimin e fajësisë nga i mbrojturi i tij, duke kërkuar nga gjykata që të shqiptojë një dënim me gjobë ose dënim me kusht, pasi që është hera e parë që i mbrojturi i tij bie ndesh me ligjin, dhe i vie keq që ka ardhë situata deri këtu.
Pas deklarimeve të palëve, gjyqtari i rastit Rrahman Beqiri pranoi pranimin e fajësisë nga i akuzuari Enis Osmani, ndërsa shpallja e aktgjykimit do të bëhet nesër, më 24 janar 2023./BetimiPërDrejtësi/
