Në një njoftim për media, nga KEDS-i kanë thënë se “kjo rritje rekord e konsumit të energjisë elektrike do të mund të vështirësojë funksionimin e sistemit elektroenergjetik të vendit”.
Nga KEDS-i kanë bërë thirrje që qytetarët të kursejnë rrymën.
“Në të njëjtën kohë, qytetarëve u bëjmë thirrje të kursejnë rrymën sa më shumë që të jetë e mundur, në mënyrë që të kemi një dimër sa më të lehtë”, thuhet në njoftim të KEDS-it.
Po ashtu, në njoftimin e KEDS-it thuhet se që të evitohet ngrohja me rrymë, të mos ndizen dritat pa nevojë, të përdoren makinat për larje pas orës 23:00 në verë e 22:00 në dimër dhe të lëshohet bojleri sipas nevojës.
“Apel për kursim sa më të madh të energjisë elektrike po bën bota mbarë, meqë të gjithë do të përballemi shpejt me një krizë të tillë, të paparë ndonjëherë. Vendet që kanë praktikuar efiçiencën e energjisë përgjatë viteve të fundit, tashmë kanë kosto më të ulëta për konsumatorë, por edhe furnizim stabil. Megjithatë, apeli për të vepruar shpejt në efiçiencën e energjisë kurrë nuk ka qenë më i duhur sesa sot. Ky apel është qëllim, e qëllimi duhet të përkthehet në praktikë. Të kursejmë bashkë, sepse vetëm kështu sistemi ynë elektroenergjetik nuk vihet në vështirësi serioze funksionimi. Shprehi të vogla, por me ndikim të madh! Vetëm duke kursyer mund t’ia dalim bashkë mbanë!” thuhet më tej në komunikatë. /teve1.info/
