Përmes një njoftimi për media nga KDI-ja kanë thënë se mospjesëmarrja e deputetëve në votim gjatë seancave dëmton funksionimin e jetës parlamentare në Kosovë, shkruan Tëvë1.info.
Sipas tyre, mungesa e kuorumit për votim të Projektligjit për Financimin e Subjekteve politike, do t’i shërbejë dhe më tutje mungesës së transparencës dhe llogaridhënies financiare.
“Mungesa e kuorumit gjatë votimit të projektligjeve shpërfaqë mungesë të seriozitetit nga ana e deputetëve, të cilët përmes mospjesëmarrjes në votim gjatë seancave të Kuvendit po dëmtojnë seriozisht funksionimin e jetës parlamentare në Kosovë. Mungesa e kuorumit gjatë seancës së sotme dhe dështimi i votimit në parim të Projektligjit për Financimin e Subjekteve Politike, do t’i shërbejë dhe më tutje mungesës së transparencës dhe llogaridhënies financiare, cilësisë së demokracisë, si dhe praktikave të mira qeverisëse”, thuhet në njoftim.
Nga KDI-ja kanë thënë se subjektet politike, pozitë dhe opozitë nuk kanë arsye për zvarritjen e mëtutjeshme të këtij projektligjit.
“Subjektet politike parlamentare – pozitë dhe opozitë – nuk kanë arsye për zvarritjen e mëtutjeshme të këtij projektligji, duke qenë se i njëjti është në përputhje me kërkesat dhe standardet ndërkombëtare, respektivisht Opinionin e Komisionit të Venedikut”.
Ndërkaq, nga KDI-ja kanë bërë thirrje që sa më parë të shqyrtohet dhe të votohet ky projektligj.
“Andaj, KDI bën thirrje që Projektligji për Financim të Subjekteve Politike të shqyrtohet dhe të votohet në parim sa më parë, duke i hapur rrugë shqyrtimit dhe eventualisht avancimit të tij në periudhën mes dy leximeve”, është bërë e ditur në njoftimin e KDI-së.
