Isufi në “Ditar” në Tëvë1, u shpreh se këtë kërkesë për njohje reciproke po e kërkojnë edhe Shtetet e Bashkuara të Amerikës dhe Bashkimi Evropian.
Sipas tij, nëse dialogu vazhdon me temat aktuale që janë teknike, nuk do të ketë ndonjë rezultat konkret, teksa “disa nga marrëveshjet nuk po zbatohen nga Serbia”.
“Prandaj duhet të kërkohet të bëhet njohja mes dy shteteve dhe çështjet e mbetura teknike mund të vazhdojnë më pas, por që njohja reciproke me një marrëveshje ndërkombëtare obligative do të ishte sukses për Kosovën dhe Serbinë si dhe për rajonin. Nëse vazhdojmë me çështjet teknike të pazgjidhura do të mbesim në këtë dialog pafundësisht dhe vetëm një marrëveshje përfundimtare do të mundësonte që edhe marrëveshjet teknike ta kenë kuptimin e vet sepse edhe partia në pushtet ka deklaruar se me temat teknike Kosova po humb kohë në përmbajtjen e saj”, deklaroi Isufi.
Tutje, ai deklaron se me diskutimin e temave teknike, Kosova vetëm sa “po stagnon edhe në procese tjera ndërkombëtare”.
Ndryshe, të premten në Kuvendin e Kosovës nuk ka kaluar mocioni i AAK-së, përmes të cilit kërkohej që të ketë një kornizë për dialogun që parandalon Qeverinë të zhvillojë dialog teknik./teve1.info/
