Sot, me rastin e ditëlindjes së komandantit Adem Jashari, në një lidhje direkte në emisionin “Ditari” në tëvë1, Gajtani tha se me të është takuar gjatë stërvitjeve në Tiranë në nëntor të vitit 1991.
“Në nëntorin e vitit 1991 kur filluan organizimet e para të Kosovës për mbrojtje pasi që në atë kohë kishte arritur Kosova në një pikë të padurueshme nga okupatori serb ku edhe filluan organizimet e para të grupeve në mënyra të ndryshme, aty ishin grupet tona ku përgatiteshim për në Shqipëri ku na u ofrua mundësia e parë që të krijonim një strukturë të mirëfilltë e cila do ta luftonte armikun. Me këtë rast në nëntor të vitit 1991, 31 vite më parë u takuam edhe me Ademin në fshatin Surrel atje në Tiranë ku edhe u zhvilluan stërvitjet tona” tha ai.
Tutje Gajtani rrëfeu bisedën e parë me komandantin të cilin thotë se e kishte pyetur se pse në atë moshë kishte shkuar për stërvitje në Shqipëri .
Sipas Gajtani, Adem Jashari i kishte thënë se ishte detyra e tij të shkonte në stërvitje për t’u trajnuar pasi që e kishte obligim dhe se atdheu ishte e vetmja gjë për të cilën kishte shkuar.
“Duke u kthyer nga ushtrimet në kazermën ku qëndronim ne u shkëputëm nga radha për t’i pastruar këpucët në një përroskë dhe unë ju drejtova pasi vazhdimisht më bënte përshtypje ai njeri, e pyeta se pse kaq vonë pse ke ardhur me këtë moshë sepse ai shihej qartë se ishte më i vjetër se ne sepse ne ishim shumica djem të rinj 20 deri 25-vjeçarë, ai mu përgjigj se kjo ishte detyra e tij, obligimi i tij dhe unë e pyeta po familja dhe ai mu përgjigj se me familje e kishte kryer dhe se e kishte të sigurt, fëmijët janë rritur dhe e vetmja gjë për të ishte atdheu”, shtoi Gajtani.
