Huruglica thotë se komunat kanë borxhe edhe të viteve të kaluara, për shkak të, ndër të tjerash, hezitimit të qytetarëve për ta paguar tatimin, përcjell teve1.info
“Dhe të gjithë pajtohen nëse duan të jenë të sinqertë, se kur është filluar para disa vitesh, baza ka qenë me e ulët…do të thotë ka qenë një bazë mos ta quaj e nënvlerësuar. Dhe për çudi dhe përkundër gjithë asaj që ka qenë shumë e ulët, të gjitha raportet tregojnë se komunat kanë pasur problem serioz për me mbledhë tatim. Shumica e komunave kanë borxhe të pagrumbulluar të viteve të mëparshme, sepse ose nuk e kanë gjet instrumentin për mbledhje, pse njerëzit në përgjithësi kanë hezituar me pagu atë tatim”, tha ai në “Këndi i Debatit” në Tëvë 1.
Sipas tij, më shumë po bëhet një zhurmë sesa që shihet si problem, teksa mori një shembull.
“Nëse dikun ka një shtëpi 100 mijë euro ose një banesë, dhe tani atij me një bazë 0.15%, është baza më e ulët tatimore që aplikohet…dhe ai ka në pronësi një objekt, një patundëshmëri 100 mijë euro, por kur i thuhet se duhet të paguash 150 euro në vit për atë tatim i duket shumë…prej perspektives time, unë mendoj se është një, mos ta quaj, një ekzagjerim i madh i vështirësive, por prapë po flas nëse e shikoni prej syrit populist, ose njerëzve të cilët megjithatë e ngrisin zanin çdo tatim, nëse ti nuk ke pagu fare, deri dje ke paguar zero dhe sot ke me pagu 100 euro, prapë është shumë, sepse je mësu mos me pagu ose ke pagu shumë pak”, shtoi ai.
Dje në rrjetet sociale është raportuar se Komuna e Prishtinës ka rritur tatimin në pronë, me ç’rast dhjetra qytetarë kanë reaguar duke e quajtur si vendim absurd.
Pas kësaj, Komuna e Prishtinës ka reaguar duke thënë se nuk e ka bërë përcaktimin e shumave në faturat e qytetarëve për vitin tatimor 2023, pasi sipas tyre është Ministria e Financave ajo e cila bën vlerësimin dhe përcakton zonat e nivelet e vlerave.
Teksa, Ministria e Financave ka deklaruar se tatimi në pronë është tatim i cili mblidhet nga komunat dhe është njëri nga burimet kryesore të të hyrave vetanake. /Teve1.info/
