Hoxha tha se po përmbyllet java e katërt e grevës prej kur 300 mijë nxënë nuk po e vijojnë mësimin,ndërsa sipas saj, Qeveria nuk shqetësohet fare për këta fëmijë.
“Njëkohësisht çka kemi pa nga Qeveria është nëpërkëmbje e dinjitetit të mësimdhënësit, përbuzje, ofendime, përçarje dhe pikërisht kjo lloj gjuhe, kjo lloj qasje nuk mund të jetë zgjidhje.
Andaj sot e ftoj kryeministrin Albin Kurti, ministren Arbërie Nagavci, ministrin Hekuran Murati që të ulen me urgjencë gjatë vikendit dhe t’i përafrojnë qëndrimet dhe të gjejnë një zgjidhje që mësimi të filloj të hënën, që fëmijët e Kosovës të hënën të jenë në bankat shkollore”, tha Hoxha.
Në një konferencë për medie, Hoxha tha se Qeveria e Kosovës është çelësi i zgjidhjes së këtij problemi.
“SBASHK-u nuk ka ngulur këmbë në 100 euro, ka thënë që mund ta diskutojmë, kurse qeveria ka ngulur këmbë që 50 euro është oferta jonë dhe asgjë më shumë.
Zgjidhja nuk bëhet nëse ne pozicionohemi me kryeneqësi, ku të gjithë flasin por askush nuk merr rezultatin e dëshiruar.
Nuk është në të mirën e Kosovës e as fëmijëve të Kosovës që ky proces të vazhdoj pa pasur epilog.
Ftoj Qeverinë e Kosovës sepse çelësi dhe zgjidhja është tek ta sepse për atë punë janë të thirrur dhe për atë punë duhet të punojnë”, Tha Hoxha.
