Përmes një statusi në Facebook, Halimi ka shkruar se kjo situatë e ka transformuar imazhin e politikës serbe duke e bërë në sytë e ndërkombëtarëve nga agresor në viktimë.
“Ndaj, në esencë, njohja reciproke, sovraniteti dhe ruajtja territoriale do ta krijonte domosdoshmërisht edhe implementimin e idesë së targave, është logjikë e kauzalitetit shkak – pasojë, rrjedhimisht do të duhej që targat të pezullohen, para se të fillonte takimi në Bruksel. Duke u krijuar një situatë e tillë, kemi transformim të imazhit të politikës serbe në sytë e partnerëve ndërkombëtarë – nga agresor në viktimë e kjo kurrsesi nuk duhet të ndodhë”, ka shkruar tutje Halimi.
Halimi ka shkruar se qytetarët e Kosovës kanë nevojë për një kryeministër që në radhë të parë është transparent dhe i informon ata se kah po shkon procesi i dialogut.
Halimi ka thënë se sado që në pamjen e parë duket e rëndësishme çështja e targave, është e pakrahasueshme me maturinë që duhet të tregoi qeveria karshi, jo vetëm aleatëve, por edhe frymës paqësore që duhet ruajtur.
Sipas saj, gjuha e kujdesshme e përafruese, sjell normalitetin që i duhet vendit.
“Janë urtësia në udhëheqje, maturia në qëndrime dhe largpamësia në vendimmarrje, ato që e ruajnë dhe e zhvillojnë shtetin. Ndërsa ‘patriotizmi’ folklorik e virtual është dritëshkurtër, pasojat e së cilit mund të mos i ndjejmë sot, por më vonë”, ka shkruar Halimi.
Qytetarët e Kosovës, sipas saj, kanë nevojë për një kryeministër që në radhë të parë është transparent, dhe i informon ata se kah po shkon procesi i dialogut.
“Së dyti, kryeministri duhet të negocioj në emrin tonë, duke e pasur parasysh gjithë historinë tonë të dhimbshme në të cilën kemi kaluar si popull, nga ku i kemi krijuar aleancat strategjike që i kemi sot. Këto aleanca nuk janë të mirëqena, nuk janë të garantuara”, ka shkruar Halimi.
