Komuna e Podujevës ka njoftuar se në takimin ku ishin të pranishëm edhe sekretari i përgjithshëm, Naim Bardiqi dhe drejtori i SHSKUK-së Valbon Krasniqi, kryetari Bulliqi ka kërkuar mbështetjen e Ministrisë së Shëndetësisë në realizimin e projekteve të cilat ndikojnë në ngritjen e cilësisë së shërbimeve shëndetësore në komunën e Podujevës.
“Në fokus të takimit tonë ishte diskutimi për projektin e ndërtimit të Qendrës Urgjente në Podujevë, ku për fillimin e tij ditë më parë kemi nënshkruar një marrëveshje bashkëfinancimi me “Qatar Charity” dhe kërkuam që edhe Ministria e Shëndetësisë të përfshihet në bashkëfinancim” tha Bulliqi.
Ai gjithashtu tha se “Kërkova eliminimin e pengesave për rekrutim dhe krijimin e mundësive për rritje të stafit shëndetësor, sepse me numrin aktual është e pamundur të ofrohen shërbime cilësore dhe sipas nevojave të qytetarëve llapjanë”.
Po ashtu, në takim Bulliqi ka kërkuar ndihmën e instancave qendore të shëndetësisë edhe për funksionalizimin e objektit të ndërtuar, afër shkollës “Enver Maloku” në mënyrë që të fillohet me ofrimin e shërbimeve specialistike për pacientët llapjanë.
Edhe ministri Latifi u zotua se Ministria e Shëndetësisë dhe SHSKUK-së brenda mundësive do ta ndihmojnë Komunën e Podujevës në realizimin e këtyre kërkesave, si dhe për projektet tjera të rëndësishme për komunën.
Në këtë takim, Bulliqi ishte bashkë me drejtorin e Shëndetësisë dhe Mirëqenies Sociale, Driton Veliu dhe drejtorin e Qendrës Kryesore të Mjeksisë Familjare, Ymer Llugaliu. /tëvë1.info/
