Në debatin parlamentar për grevën, Bajrami tha se në situatën kur 318 mijë fëmijë janë jashtë bankave shkollore, Nagavci dhe kryeministri, Albin Kurti po qëndrojnë të relaksuar.
“Kryeministri po harron që ministre të Arsimit e ka Nagavci e cila në kohën e zgjedhjeve lokale e ka shkelë Kushtetutën e Kosovës për me pengu reformën në arsim të ish-kryetarit Kastrati me arsyetimin se 500 nuk po vijojnë mësimin. Sot e njëjta bashkë me kryeministrin qëndrojnë të relaksuar derisa 318 mijë nxënës janë jashtë bankave dhe çerdheve”, tha ajo.
Tutje, deputetja opozitare tha se në Ligjin e Pagave thuhet që publikohet në Gazetën Zyrtare tetë muaj pas miratimit.
Lidhur me këtë, reagoi Nagavci e cila pyeti Bajramin se si garanton që projektligji mund të publikohet në Gazetën Zyrtare një muaj pas miratimit.
“E nderuar deputete veç sa për informacionin tuaj edhe në takim me SBASHK-un edhe publik Kurti e ka bërë me dije që pakoja do të rishqyrtohet në fund të dhjetorit që të mbështetet në muajin e ardhshëm. Kam një pyetje për ju, sepse thatë që garantoni që projektligji hyn në fuqi pas një muaji, si ish-ministre e Arsimit dhe Financave ju kisha lutë të na tregoni si hyn në fuqi për një muaj?”, tha ajo.
E në kundërreplikën e saj, Bajrami i tha Nagavcit se po të ishte në vendin e saj nuk do të mund të qëndronte ulur për shkak se 318 mijë nxënës janë jashtë bankave shkollore.
“Ministre fillimisht mendova mos po na tregon si e ke shkelë Kushtetutën, ligjet që ne i votojmë hyjnë në fuqi shtatë ditë pas publikimit në Gazetën Zyrtare, shumica e ligjeve ju na tregoni se cili është arsyetimi juaj që një ligj i tillë që nuk po hyn në fuqi 8 muaj pas publikimit në Gazetë Zyrtare. Derisa ju i keni dhënë premtimet që pakoja do të rishqyrtohet në dhjetor 318 mijë janë jashtë bankave, sinqerisht mos qofsha në lëkurën tënde, s’kisha mujt me qenë ulur aty ku je”, tha ajo./teve1.info/
