E pavarësisht që emërimi i saj si këshilltare politike po shihet si përçarës për shkak të postit që ka si kryetare e një partie në Preshevë, ajo thotë se tashmë e rëndësishme është që shqiptarët atje kanë një adresë të posaçme.
Në anën tjetër, me këtë emërimin nuk po pajtohet i pari i Luginës së Preshevës, Shqiprim Arifi.
Edhe pse nuk propozon emra për këtë pozitë, ai mendon që është shkelur e drejta e mendimit demokratik atje, duke mos u dakorduar me të gjithë partitë politike.
Mirëpo sipas njohësit të çështjeve të politikës, Belgzim Kamberi, me këtë emërim Lugina e Preshevës do të jetë punë e përditshme e Qeverisë së Kosovës.
Kamberi thotë se kjo ka më shumë rëndësi se emrat, pasi sipas tij emrat edhe mund të ndryshojnë, mirëpo institucioni mbetet.
Ndërsa, deputeti i Lidhjes Demokratike të Kosovës, Driton Selmanaj thotë se këtë zyre e ka themeluar Qeveria Hoti.
“Albin Kurti promovon si ide dhe vendime të reja diçka që para dy vitesh Qeveria Hoti i ka marrë. Më 28 shtator 2020 Qeveria e Kosovës më qëllim të institucionalizimit të mbështetjes shtetërore për shqiptarët që jetojnë në Preshevë, Medvegjë e Bujanoc ka votuar në mbledhjen e saj për themelimin e kësaj Zyre. Me qëllim të zbatimit të këtij vendimi me 13 janar 2021 qeveria Hoti ka miratuar edhe planin e punës për këtë Zyre, ku janë përcaktuar dhe detyrat konkrete për ministritë e caktuara”, tha ai.
Një zyrë të tillë në Luginë të Preshevës, Beogradi e ka që 20 vjet.
Kronika e gazetares Fetije Kamberi.
