Profesori universitar, Arben Fetoshi ka thënë se kjo video është instrument propagande i Vetëvendosjes, publikimi i së cilës nuk është befasi për profesorin.
“Mua më vjen keq që Rrahman Jasharaj gjendet në këtë video. Një portretim i tillë i Sindikatës së Arsimit mendoj që është me efekte jashtëzakonisht negative dhe besoj që këtu nuk ka shpjegim tjetër përveç asaj me terma të propagandës”, ka thënë Fetoshi.
Ai ka shtuar se në video nuk sqarohen disa ngjarje të ndodhura gjatë Qeverisë Kurti.
“Videos i mungon shtojca që ka vjedhje të provave në rastin e Astrit Deharit në Institutin e Mjekësisë Ligjore, ka lirim të një të dyshuari për terrorizëm, ka afera korruptive të raportuara vazhdimisht nga mediat, ka qeverisje nga ministra me aktakuza, ka privatizim me negociim pa tenderë, e çka s’ka tjetër”, ka thënë Fetoshi.
Sipas tij, puna e opozitës duhet të vlerësohet nga mediat e ekspertët.
“Nuk dua të vihem në rolin e opozitës por pa dyshim që s’mund të pajtohem edhe me narracionin e pushtetit aktual i cili vazhdon të mos heqë dorë nga mjetet e propagandës. Nuk jam i prirur me pa që Qeveria duhet të afishoj kështu arritjet e veta. Është punë e medias, ekspertëve që duhet në mënyrë kritike të shqyrtojnë arritjet dhe dështimet e jo të përpiqet që nëpërmjet kësaj forme propagandistike ta mbaj të manipuluar një opinion të qytetarëve”, ka shtuar ai.
Kurse profesori tjetër universitar, Dorajet Imeri ia ka shtruar disa pyetje partisë në pushtet.
“Nuk është shumë negative ajo çka thotë video sepse ajo është nga një subjekt politik, por çka ka dhe çka s’ka, pyetja famoze duhet të bëhet edhe për Qeverinë. Unë po e pyes Qeverinë, në video nuk e kemi pasur asnjë diskutim sa i përket sistemit të arsimit. Ne kemi fol për sindikatat, por jo për arsimin. Nuk e kemi pasur asnjë prononcim për shëndetësinë e zhvillimit ekonomik. Duhet të tregojnë se çka ka ndodh me milionat që kanë mbetur pa u shfrytëzuar, pra suficit”, ka deklaruar Imeri.
