Berishaj përmes një shkrimi në “Facebook” është “sqaruar” për këto dyshime. Ai ka thënë se nuk është pronar apo aksionar i ndonjë kompanie në Kosovë, apo në vend tjetër, shkruan teve1.info.
Po ashtu ai i ka hedhur poshtë pretendimet se ka fshehur apo deklaruar rrejshëm pasurinë.
Përmes një statusi të gjatë, Berishaj ka thënë se kompanitë Zaslon L.C.C. dhe Myloja sh.p.k nuk janë në pronësinë e tij.
Për “MB consulting d.o.o” ka thënë se nuk ka pasur qarkullim që nga 2020 e rrjedhimisht nuk e ka parë të arsyeshme ta deklarojë si pronë.
“MB consulting d.o.o. në Mal të Zi nuk nuk ka pasur qarkullim që nga viti 2020 dhe mbyllja e saj fizike sipas organeve të Malit të Zi, pas kërkesës sime për mbyllje, ka qenë çështje ditësh, dhe meqenëse bëhet fjalë për një kompani që nuk ka pasur aktivitet që nga vitit 2020 dhe ka qenë në proces të mbylljes, nuk ka pasur arsye të deklarohet si pronë”, ka shkruar ai.
Ndërsa për ”MB consulting sh.p.k”, ka thënë se aksionet e saj ia ka bartur një personi të tretë në tetor 2021.
“Ndërsa sa i përket deklarimit dhe pagesës së tatimeve, kompania MB consulting sh.p.k. ka deklaruar të gjitha detyrimet tatimore sipas legjislacionit në fuqi, në Adminsitratën Tatimore të Kosovës. Pagesa e një pjese të detyrimeve është bërë nga kompania që është person juridik, kurse pjesa tjetër vazhdon të paguhen nga kompania që tash është në pronësi të tjetërkujt. Kushdo që kupton nga kontabiliteti, e din që borxhi tatimor nuk ka fare të bëjë me shmangie tatimore, gjë për të cilën po shpifet kundër meje. Prandaj edhe kjo e pavërtetë bie në ujë, sepse asnjëherë nuk ka pasur shmangje tatimore, por bëhet fjalë për borxh tatimor, i cili është deklaruar nga vetë ndërmarrja, dhe vazhdon të paguhet”, ka shkruar Berishaj.
E në fund Berishaj ka shkruar se pretendimet që GEN-i është kompani serbe janë vetëm për ta denigruar karakterin e tij.
“Dhe për fund, akuza e insinuata se gjoja kompania GEN-I qenka ndërmarrje serbe, është tërësisht e pavërtetë gjithashtu. Ndërmarrja GEN-I, trgovanje in prodaja električne energije, d.o.o. Krško, Slloveni, është kompani me të cilën kam pasur marrëdhënie kontraktuale si këshilltar në kohën kur nuk isha as shtetas i Republikës së Kosovës. Kjo kompani është kompani sllovene e cila për themelues ka kompaninë GEN ENERGIJA d.o.o. e cila është në pronësi të plotë të Republikës së Sllovenisë, dhe ka filiale nëpër shumë shtete në rajon, ngjashëm sikurse ka ta zëmë edhe NLB Banka, e cila përveç filalave në Slloveni, ka degë edhe në Prishtinë, Shkup, Beograd, etj”, ka shkruar ai.
