Sa i përket vendimit për targat dhe tensionimin e situatës në veri të Kosovës, Abdixhiku gjatë një interviste për Zërin e Amerikës, tha se Qeveria që në fillim e ka bërë zgjedhjen gabuar.
“Një qeveri që sjell popullin e Kosovë të zgjedh mes ligjshmërisë në territorin e vet dhe aleatëve të vet, që në fillim kanë bërë zgjedhjen e gabuar. Sepse nuk mund të ecim as pa aleatë e as pa ligjshmëri. Pra dhe aleanca ose koordinimi me partnerët tanë bëhet në shërbim të vënies së ligjshmërisë. Asnjë zë publik ndërkombëtar nuk ia ndalon të drejtën Republikës së Kosovës për të vendosur ligjshmërinë në gjithë territorin e vet por në periudhën e tanishme është jetike që Kosova mos të bëhet pjesë e grackës destabilizuese në rajon, nisur padyshim nga Beogradi dhe më pas të krijojmë një situatë të re nga e cila nuk mund të dalim”, tha Abdixhiku.
Sipas tij, tërheqja e minoritarëve nga institucionet e vendit lë vakum në pozitat udhëheqëse dhe gjurmë me aleatët ndërkombëtar.
“Janë dy çështje që Kosova duhet ti ketë parasysh. Stabiliteti brenda Kosovës. Kosova të mos bëhet vatër e provokimeve të Serbisë që do të prodhonin situata të paparashikueshme por të ketë koordinim të plotë me faktorin ndërkombëtar me SHBA-të dhe aleatët evropian. Çdo vonesë në këtë koordinim të ngushtë lë hapësirë edhe për destabilizim të vendit por edhe situata të paparashikueshme por mbi të gjitha gjurmë të pariparueshme”, tha Abdixhiku.
Dhe çështja e dytë me rëndësi për Kosovën sipas tij, shmangia e “status-quos” në mes të relacioneve që Kosova duhet t’i ketë me aleatët e vet.
“Çdo vonesë e Kosovës, çdo marrje me çështje teknike me çështje me rëndësi më të vogël nuk është në favor të Kosovës dhe interesave tona, kemi nevojë për guxim politik, ecje me aleatët tanë dhe marrëveshje që ka njohjen në thelb të saj”, tha Abdixhiku.
