Në konferencën përjavshme, Abazi tha se afër kësaj datë të gjithë janë të alarmuar, e posaçërisht partnerët ndërkombëtar për mundësinë e përshkallëzimit të situatës atje.
“E dimë që Serbia është e paparashikueshme në atë se çfarë mund të bëjë duke përdorur qoftë edhe jetët e qytetarëve serbë në veri”, tha Abazi.
Ai shtoi se është e rëndësishme që çdo qytetar në veriun e vendit të ndihet i sigurt.
“Ashtu si edhe çdo qytetar në Kosovë që duhet të kuptoj që Serbia nuk e ka për qëllim mbrojtjen e serbëve por përkundrazi është duke i përdorur si mburojë për pozicionimin e vet drejt Rusisë”, tha Abazi.
Sipas tij kjo u pa qartë me largimin e deputetëve serbë nga Kuvendi i Kosovës dhe zëvendësimi i tyre nga Lista Serbe në mënyrë që të mos lejoj përfaqësim të drejtë në Kuvendin e Kosovës.
“Andaj strategjia dalëse nga kjo situatë duhet të na kthej në tavolinën e bisedimeve me partnerët strategjik dhe planin e përgjithshëm përtej dialogut për të parandaluar përshkallëzimin e çfarëdo të situatës në favor të Serbisë dhe sipas planit që Serbia ka atje”, tha Abazi.
Abazi në konferencë foli edhe për nevojën e sigurimit të energjisë dhe krizën në këtë sektor, si dhe largimin urgjent të materialit ndërtimor azbest nga përdorimi, i cili sipas tij gjendet akoma në masë të madhe si material i çative, kryesisht objekteve publike në Prishtinë.
