Në atë dokument tregon se si para një viti Njësia Kundër Terrorizmit në Kosovë kishte zbuluar një plan që ishte bërë për ta ekzekutuar kryeministrin e Kosovës, Albin Kurti, më pas Ismet Haxhën, ish-anëtarin e Shërbimit Informativ të Kosovës, si dhe Xhavit Halitin, deputetin e PDK-së.
A2News ka bërë të ditur se nuk ka mundur të verifikojë dokumentet.
I dyshuari për të kryer këtë plan thuhet se ishte Prek Kodra. Në dokument thuhej se ai ishte snajperist i mirë.
Kodra dyshohet se është përfshirë në disa vrasje në Kosovë dhe Mal të Zi. Ndërkohë, thuhet se jeton në Shkodër, e vepron në Tropojë, Ferizaj dhe Deçan.
Mendohet se plani i parë ishte të ekzekutohej Haxha, ndërsa objektiv i dytë ishte Haliti. Në fund do të vritej kryeministri Kurti, e qëllim i këtij aksioni do të ishte destabilizimi i Kosovës.
“Sipas Policisë Shqiptare, ky person është me precedent penal dhe është hetuar për vrasje me paramendim dhe mbajtje pa leje të armëve të gjahut. Ai u shpall në kërkim në vitin 2016, ndërsa pas kontrolleve në banesë iu gjetën dy armë gjahu dhe 90 fishekë. Në shtator të vitit të kaluar u pezullua urdhri i kërkimit, ndërsa konsiderohet si person me rrezikshmëri të lartë. Sipas informacione të Njësisë Kundër Terrorizmit, objektivi i parë do të ishte Ismet Haxha. Objektivi i dytë ishte Xhavit Haliti, i cili do të vritej një muaj pas Haxhës për t’u dukur si hakmarrje. Më pas, do të vritej edhe kryeministri Albin Kurti. Sipas informacioneve, qëllimi i këtyre atentateve është destabilizimi i Kosovës. Po ashtu, në dokument theksohet se të tre atentatet do të kryheshin në 4 muajt e ardhshëm”, thuhet nga A2News.
Në dokumentet e rrjetit të hakerave, jepen të dhëna mbi familjen e Nanos, por edhe hyrje-daljet e ish-kryepolicit në vend, që nga pikat kufitare tokësore dhe deri tek ato ajrore. Rrjeti i hakerave “Homeland Justice”, nuk kanë kursyer asnjë detaj të të dhënave të ish-numrit një të Policisë së Shtetit. Nga një kqyrje paraprake, mund të thuhet se të dhënat janë marrë nga sistemi TIMS.