Kanë kaluar 10 orë bisedime në Ohër mes kryeministrit Kurti, presidentit serb Vuçiq dhe përfaqësuesve të Bashkimit Evropian dhe atyre nuk i është dhënë ende epilog.
Gazetari Shpat Blakçori i cili po qëndron atje thotë se mosmarrëveshjet më të mëdha janë sa i përket Asociacionit, më saktësisht kompetencat që ky mekanizëm duhet t’i ketë.
“Jemi afër orës së 10 qëkur kanë filluar negociatat mes të dyja palëve me qëllimin për normalizimin e marrëdhënieve mes vendeve. Çështja më problematike mes të dyja palëve është Asociacioni i komunave me shumicë serbe. Kryeministri i Kosovës kategorikisht ka refuzuar ta implementojë një Asociacion mbi baza etnike, presidenti serb kërkon një Asociacion me kompetenca ekzekutive. Fokusi kryesor në këtë takim është të implementohen marrëveshjet e arritura deri më tani, pasi siç e dimë mbi 30 janë arritur por për shumicën ka munguar zbatimi”, ka thënë Blakçori në një lidhje direkte në Këndin e Debatit në Tëvë 1.
“Problemi qëndron se çfarë kompetenca do të ketë asociacioni dhe prandaj po diskutohet më së shumti në këtë pikë e cila është më kontraverzja”, ka vazhduar ai.
